Rom 14 | DOB | STEP | Ta 'aina tomota 'idi emisa nenetadi, nigeya waiwaidi, 'enega 'ilobwenena be 'ediya tada tagwala be ma'edao taeboda 'ebweuna, ta geya'abo ma'edao taegewagewana.

Romans 14

Lo'aegila manuna

1 Ta 'aina tomota 'idi emisa nenetadi, nigeya waiwaidi, 'enega 'ilobwenena be 'ediya tada tagwala be ma'edao taeboda 'ebweuna, ta geya'abo ma'edao taegewagewana. 2 Manuna 'idi nuwanuwa nigeya palupaluna, be 'enega 'aidi tomota sigwae, “Masula maibo'ana 'ilobweneda be ta'enidi,” ta 'aidi 'idi emisa nenetadi sigwae, “Yobai esiyona geya'abo tae'ani.”

3 'Ilobwenena be taudi yobai esiyona sie'ani geya'abo gosediyao silo'alo'aegiledi, taudi nigeya yobai esiyona sida 'enina, be esiyo 'ana toedidigula nidi geya'abo wate gosediyao taudi esiyo sie'ani silo'alo'aegiledi, manuna Yaubada ni'atu 'iesinuwedi be 'aene natunao, 4 ta wate tauna 'ina toguinuwao, 'enega tauna tuga 'adi to'ita'i'ita, ta 'oyo nigeya. Manuna tauna 'ina 'ebeloina be 'i'awa bobo'anedi nai nigeya, ta wate sawesawenaya be 'ida giewaiwaiyedi, be 'enega geya'abo neneta silobaloba.

5 'Aina tomota wate nadigega 'idi nuwanuwa, 'aene 'aina 'asiyata dimo 'asiyata sinabwadi, ta esi 'aina gosediyao 'idi nuwanuwa 'aene 'asiyata maibo'ana leleleya tuga. 'Abo yage getedi nadigega talobadi, 'ilobweneda be 'ebweuna 'ebweuna taudamo, 'abo to'ase tamwalatonina 'aene bobo'ana, tada muliye, 6 manuna 'abo yaita 'asiyata 'aina 'inuwedi 'aene 'asiyata sinabwadi, nate tauna sa'i 'ina nuwanuwa be 'aene gote 'enega Yaubada 'i'amayabe. Wate nadigega 'abo yaita masula maibo'ana 'ie'enidi, nate tauna sa'i 'ina nuwanuwa be 'enega Yaubada 'i'amayabe, 'enega masula nidi manudi 'ilokagutoki Yaubada 'enaya. Wate nadigega 'abo yaita 'aina masula 'ediyega 'iedidigula, tauna sa'i wate 'ina nuwanuwa be 'enega Yaubada 'i'amayabe ma ina lokagutoki.

7 Ga ona'ai'aila, nigeya sawesawedaya be tauda taloineda, nai wate yawasida be 'ida mwawasa manudi taloine. 8 'Ida 'Inapwana tauna yawasida maibo'ana be 'ida mwawasa 'adi toloina. 9 Gete 'alena 'enega Keliso 'imwawasa ga 'itoolo limana, be 'enega 'aene tomwawasao be 'abo'ada mayawasida maibo'ada 'edaya 'ida etoloina.

10 'Enega wanuwa'i'isi be geya'abo tasimiyao walo'alo'aegiledi, manuna 'etamo maibo'ada Yaubada matanaya tatoolo be 'enega tauna 'ida loineda, 11 nadigega Buki Tabu 'ina simana 'igwae,

“Ona'ai'aila, 'abo'agu miyamiya atayagu, 'enega tomota maibo'adi mataguya sibwabwago, ta wate sida 'awa'inapwanegu.”

12 Manuna 'abo'ada 'ebweuna 'ebweuna tauda 'ida bubuna tada simanedi Yaubada 'enaya.

Geya'abo gosedao tagiegie nenetadi

13 'Enega gosedao geya'abo ta'awa'awa to'umaliyedi, ta esi tauda 'ida bubuna be 'ida guinuwao tada 'ita'i'isidi, be 'enega geya'abo 'ebweu gosedai tagiegiebe'uye 'idi edidigula 'ediyega.

14 Ta ona'ai'aila, 'ida 'Inapwana Yesu ni'atu 'igienuwa sabwalenigu ga yamwalatonina 'aene nigeya 'ebweu masula 'eto'etobodana 'imiyami, ta esi 'abo 'ebweu tomota 'inuwena 'aene 'aina masula 'eto'etobodadi, 'etoboda nidi tauna tuga manuna. 15 Nai 'abo 'aidi gosedao sinuwanuwa 'aene esiyo yage 'eto'etobodana, be 'abo esiyo nina 'u'e'ani 'iabe tomotai nidi sinuwanuwamwau. Ta esi 'uda nuwa'i'isi 'aene tomotai nidi manudi Keliso 'imwawasa, 'enega geya'abo yage nina 'eto'etobodana matadiya 'u'e'ani 'abona nai 'ugienenetadi.

16 Ta 'e'ai nina 'emuya 'aene bobo'ana, ta esi mali tomota 'ediya nigeya, be 'abo si'itayo 'u'e'ai 'iabe si'awa to'umaliyeyo. 17 Ta esi wada nuwa'i'isi 'aene Yaubada 'ina 'ebeloina nigeya masula be bwasi manudi, ta esi bubuna bobo'ana be nuwasiwalowa be gwausowala, Yaluyaluwa Tabuna 'enega, manudi. 18 Be 'abo bubuna nidi gete 'ediyega Keliso 'ina guinuwa taguiguinuwe, 'iabe Yaubada manuda 'igwausowala, ta wate tomota si'awa bobo'aneda.

19 'Enega 'ilobweneda be 'ida 'ebe masi nuwasiwalowa, be 'enega 'ebweuna 'ebweuna 'enaya tada elemalema. 20 Ta esi geya'abo 'ami 'e'ai 'enega Yaubada 'ina guinuwa wagiegie to'umaliye, manuna masula maibo'adi bobo'adi, ta 'abo 'aina masula 'ediyega gosedai tagiebe'uye, masula nina geya'abo wate tae'ani. 21 'Enega gete tugai 'ilobweneda be yage nidi manudi gosedao siedidigula, esiyo nai oine, geya'abo tagitogitoodi, 'abona nai tagiebe'uyedi.

22 Ni'atu 'imi guinuwao waemisedi 'aene bobo'adi Yaubada matanaya, ta esi 'abo geya'abo gosemiyao wagiegie be'uyedi nate 'ebe gwausowala sinabwana 'emiya. 23 Ta wate 'abo ma ida enuwanaluwa masula nidi ta'a'ani, nate ni'atu taloegesi Yaubada matanaya, manuna nigeya taemiemisa. Ga ni'atu tamwalamwalatoni 'aene 'abo to'ase taguinuwe, ta nigeya ma ida emisa, nate loegesi.